Забаўляльная праграма пачнецца ў 13:00 з тэатралізаванага шэсця.18 лістапада ў аграгарадку Адэльск адбудзецца дзясятае юбілейнае «Свята Млынароў». Яго госці змогуць пакаштаваць традыцыйныя стравы, паўдзельнічаць у розных абрадах, а таксама бліжэй пазнаеміцца з унікальнай культурай Гродзенскага раёна. Па словах намесніцы дырэктара Гродзенскага абласнога метадычнага цэнтра народнай творчасці Наталлі Рамановіч, брэндавае свята ўдзельнікі чакаюць кожны год.
– «Свята Млынароў» спалучае у сабе элементы гісторыі, крэатыва і душэўнасці, якія нікога не пакідаюць абыякавымі. Для бацькоў з дзецьмі гэта – магчымасць ў форме гульні пазнаёміцца з нацыянальнай культурай. У той жа час моладзь можа трапіць на дыскатэку. «Свята млынароў» не толькі брэндавае свята аграгарадка Адэльск і Гродзенскага раёна, але і доказ таму, што нават нікуды не выязджаючы, можна выдатна правесці выхадныя амаль бясплатна, – расказала Наталля Рамановіч.
Адным з галоўных момантаў мерапрыемства стане выпяканне хлеба, сапраўднага сімвала млынарства. Дарэчы, у аргагарадку абрад раней суправаджваўся выступамі музыкаў-самародкаў. Вось і на «Свяце млынароў» кожны зможа паслухаць незвычайнага чалавека, музыку і майстра па вырабе драўляных музычных інструментаў Мар’яна Скрамблевіча.
– На жаль, пэўны час музыка нашых дзядоў і прадзедаў на вёсцы была незапатрабаванай. Сёння ж носьбіты вясельнай музычнай традыцыі, напрыклад, Мар’ян Скрамблевіч, прыкладаюць усе намаганні, каб удыхнуць у народнае інструментальнае выканальніцтва новае жыццё, адрадзіць і зберагчы несправядліва забытую каштоўнасць. Гэтую традыцыю работнікі Адэльскага цэнтра культуры і народнай творчасці лаканічна аб’ядналі з абрадамі па вырабе хлеба. Ім больш за сотню гадоў. Млынарскія традыцыі Адэльска прасякнуты мудрасцю, жыццёвым вопытам, філасофіяй жыцця нашых дзядоў і прадзедаў, – дадала Наталля Рамановіч.
Тэматычныя пляцоўкі пачнуць працаваць а 12.00. Святочную праграму адкрые тэатральная шэсце а 13:00.
ДАРЭЧЫ
Аграгарадок Адэльск – мястэчка на Гродзеншчыне, жыхары якога спрадвеку займаліся млынарствам. Адэльчане пякуць хлеб па адмысловымрэцэпце. Традыцыйная кухня аграгарадка (бігас, бабка і іншыя стравы) занесена ў Дзяржаўны спіс гісторыка-культурных каштоўнасцей Рэспублікі Беларусь, як і творчасць майстра па вырабе драўляных музычных інструментаў Мар’яна Скрамблевіча.
